కరిగించే మా కండబలం

మా కార్చిన ఘర్మజలం

ప్రపంచైక్య కార్మికులం

మేడే లాల్ సలాం..!

#రాఖీ రవ్వలు

పరిమళ పూవనం

ప్రజ్వల హవనం

ప్రకటిత జీవనం

అవిరళ కవనం..!

#రాఖీ రవ్వలు

ఇదా జీవితం.!

ఇదీ జీవితం.,

ఇదో జీవితం?!

ఇదే జీవితం..!!

#రాఖీ రవ్వలు

చీరను పట్టిచూడు

కుండను కొట్టిచూడు

గుండెను తట్టిచూడు

గీటురాళ్ళే అన్నీ..!

#రాఖీ రవ్వలు

తెలిసి వస్తే

తెలివి వస్తే

తెరలుతొలిగితే

ఉగ్రవాద విరోధం..!

#రాఖీ రవ్వలు*

వాహ్ఁ.,

మనం

మనవామన కవనం

రూపుకొంచం భావన ఘనం..!

#రాఖీ రవ్వలు

ఓ సీత

ఓ భూమాత

ఇంట్లోనే 

సహనశీలి ఇల్లాలు!

#రాఖీ  రవ్వలు

ఓంకారం జగతికి

శ్రీకారం ప్రగతికి

ప్రాకారం ప్రకృతికి

నమస్కృతి గణపతికి..!!

#రాఖీ రవ్వలు

రవ్వ దోస

రవ్వ కేసరి

రవ్వల నెక్లెస్..

రవ్వలే రవ్వలు..!

పరిమళ పూవనం

ప్రజ్వల హవనం

ప్రకటిత జీవనం

అవిరళ కవనం..!

#రాఖీ రవ్వలు

ఆకలి తీర్చే మెతుకులు

చేజాచనీయని ఖర్చులు

సేదదీర్చెడి ఆరడుగులు

బ్రతుకున పసిడి గనులే..!

#రాఖీ రవ్వలు

ఆదరిస్తే అమ్మలు

ప్రదర్శిస్తే బొమ్మలు

పద్ధతికి పట్టుగొమ్మలు

భారతీయ పడతులు..!

#రాఖీ రవ్వలు

రవ్వలు 

బ్రతుకు దివ్వెలు

ఐతేనె సార్థకత..

కవనమంటే జీవనమే..!!

మట్టి అక్షరాలు

మలిస్తే శిల్పాలు

ఏమరిస్తే శిథిలాలు

నైపుణ్యం సాంతం..!

కన్నవారి సంస్మరణ

స్మృతి శాశ్వతీకరణ

సముచిత వితరణ

పురస్కార బహుకరణ..!

#రాఖీ రవ్వలు

మనసు మించని మతం

గడప దాటని కులం

మానవతకే హితం

విశ్వప్రేమ మహితం

#రాఖీ రవ్వలు

ప్రతిభ గుర్తింపు

ప్రావీణ్యతా ప్రశంస

పురస్కార స్వీకారం

గురుతర బాధ్యత..!

#రాఖీ రవ్వలు

మనిషి ప్రాణం

ఎంత హీనం

రెండుపళ్ళ కొలమానం.,

రివాజే ప్రభుత మౌనం..!

#రాఖీ రవ్వలు

మరణం నాకేనా..

ప్రపంచానికీ..

నాకు సంబంధించి

ఆత్మకు చావులేదు..!

#రాఖీ రవ్వలు

బ్రాందీ షాపుకీ

గాంధీ పేరే

జాతిపిత కదా

పితృభక్తి..!!

#రాఖీ రవ్వలు

పద పటాటోపం

రూప ఆర్భాటం

కాదు కవనం..

అది ఎద భావ చిత్రణ..!

#రాఖీ రవ్వలు

వాన పడ్తుంది

ఎండకొడ్తుంది

చలి పెడ్తుంది

ఎంత మంచిదో శీతాకాలం..!

#రాఖీ రవ్వలు

కురిసే వర్షం

మెరిసే కిరణం

హరివిల్లు ఆవిష్కరణం..

ప్రకృతి చిత్రమే..!

#రాఖీ రవ్వలు

గరాటు ఏకోన్ముఖ సూచీ..

తరాజు వ్యక్తిత్వాన్ని తూచీ..

పట్టకం దృక్కోణం విస్తృత పరచీ

కాదేదీ బోధ కనర్హం..!

#రాఖీ రవ్వలు

రెక్కలతో ఎగిరితే

మబ్బులదాకే

ఊహకు ఊతమెందుకు,

గగనాలనధిగమించు..!

#రాఖీ రవ్వలు

దాదాపు ఒకే భావాన్ని వివిధ లఘు కవితా ప్రక్రియల రూపాల్లో...byడా. రాఖీ

రవ్వలు(Designed by BHUPATHI RAJU)

సత్వర పతనమే

నియంతలైతే

ప్రజాస్వామ్యంలో..

ఓటే ఆయుధం..!

***  ***   ***

నియంత హత్య,

ఆయుధం ఓటే..!

ఇది 'లబ్ డబ్'Designed by డా.రాఖీ(me)

***   ***   ***   ***

జగమంతా

నియంత

పాలనలో

పాదాక్రాంతం..

ప్రజాస్వాయంలో

ఓటే బ్రహ్మాస్త్రం..!

రెక్కలు Designed by సుగమ్ బాబు

***   ***   ***   ***

ఎంతటి నియంత లైతేనేం..!

దుంప తెంచదా ఓటే ఖడ్గమై.,ప్రజాస్వామ్యంలో..!!

(ఫెంటో Designed by Arun Rajam)

***   ***   ***   ***

నియంత 

పతనం

ఓటు

గుణపాఠం

నానో- Designed by Ega HANMAN

***   ***   ***   ***

నియంతృత్వం

సాగినంతకాలమే

ఓటుకి చోటుంటే

సమూల ఖననమే..!

నానీ Designed byడా.ఎన్.గోపి

***   ***   ***   ***

ఓటు పోటే చాలు,నియంతలైనా నిర్వీర్యులవరూ..!

 ఏక వాక్య కవిత by డా.ఆచార్య ఫణీంద్ర

***   ***   ****    ***

మూల భావన by శ్రీ నూతక్కి రాఘవేంద్ర రావు గారు

సమస్యలు

నీకేనా

సోషల్మీడియాలోకి 

చొరబడు

చెఱపకనే గీత చిన్నదౌతుంది.,

పెద్దగీత గీస్తే..!!

>< రాఖీ   రెక్కలు

ఎన్నికలవే

నేతలూ వాళ్ళే

పార్టీలుమారుతూ

గురివిందలౌతూ..

దేశానికి దిక్కులేదు

ఓటరుకి చక్కిలేదు..!

#రాఖీ రెక్కలు

విద్య

వైద్యం

న్యాయం

వ్యవ'సాయం'

మృగ్యమై

వధ్యశిలలుగా

#రాఖీ  'రెక్కలు'

తనుగా అక్షరం 

అర్థరహితం

మరోఅక్షరంతో

చేసినపుడె మైత్రి

అచ్చరమచ్చరంగా

పదమై ఏలుతుంది ధరిత్రి..!

#రాఖీ రెక్కలు

రవి కమలం

భువి భ్రమరం

అవినాభావ

అనుబంధం.,

గతి తప్పితే

అధోగతే..!

#రాఖీ రెక్కలు

వ్యక్తులే వేరు

తల్లులంతా ఒకటే

మమతానురాగాలు 

సేమ్ టు సేమ్..

ఆడవారినావహించే

అమ్మతనం దైవత్వం..!

#రాఖీ రెక్కలు

నిత్యానుష్ఠానం

జ్వలిత 

హవనం

కవనం

చితివరకూ

గతితప్పక!!

#రాఖీ రెక్కలు

నింగిలో

హరివిల్లో

ముంగిల్లో

రంగవల్లో

కనువిందు పందెం

గెలుపు ప్రకృతిదో పడతిదో..!

#రాఖీ రెక్కలు

అవిటితనం

మనసు'కుంటే

మనిషి 

అష్టావక్ర..

సుందరుడైనా

చందురుడైనా..!

#రాఖీ రెక్కలు

పచ్చని చెట్టు

తేనె పట్టు

చిన్ని పిట్ట

ఎత్తు గుట్ట..

అన్నీ గురువులే

నేర్చుకో గలిగితే..!

#రాఖీ రెక్కలు

వానా రాదు

ప్రాణమూ పోదు

ఆవిరైన కంట

కన్నీరూ కరువే.,

దుర్భిక్షం

స్వయంకృతాపరాధం!!

#రాఖీ రెక్కలు

కవులకోసం

విమర్శకులకోసం

విబుధులకోసం

దీర్ఘ కవిత..

నా లఘు కవిత

సామాన్యుడి జత..!

#రాఖీ రెక్కలు

వాన

మాను

పరస్పరం

ప్రాణాధారం.,

పర్యావరణం

ప్రకృతి వలయం..!

#రాఖీ రెక్కలు

మంచి 

చెడు

ఇదమిద్ద

రహితాలు..

దేశకాల పరిస్థితులు

కొలమానాలు..!

#రాఖీ రెక్కలు

పాలూ, నీళ్ళూ

ఒకటే రేటు

ఉప్పు ,చక్కెర

అదే రూటు

భరతావని

రైతు గ్రహపాటు..!

#రాఖీ రెక్కలు

శుభముహూర్తాలు

మేళతాళాలు

వేదమంత్రాలు

కంఠసూత్రాలు..

మనసులకు ముడులు

భవితకు బంగరు అడుగులు..!

$రాఖీ రెక్కలు

వానాకాలం వరదలు

ఎండాకాలం కరువులు

చలికాలం జలుబులు

కాలం ఓ మాయాజాలం

ఎదురీదాలి

కొట్టుకపోకుండా..!

#రాఖీ రెక్కలు

లాలి పాటలు 

గోరుముద్దలు

ఓనమాలు దిద్దడాలు

త్యాగాలు ప్రేమలు

ఎవరి అమ్మైతేనేం

అందరి కథ ఒక్కటే..!

#రాఖీ రెక్కలు

కులమతాతీతుడు

ప్రకృతి ప్రేమికుడు

సమసమాజ హితుడు

మానవతా దీపకుడు

రేయింబవళ్ళ రవి

వికాస దిక్సూచి కవి

#రాఖీ రెక్కలు

అదృష్టం

ఎండమావి

శ్రమతత్వం

ఊటబావి..

దప్పిక తీర్చేది

ఓపికే..!

#రాఖీ రెక్కలు

రెక్కలకష్టం

పక్షులు ఎగరడానికి

మనుషులు ఎదగడానికి

పంకా తిరగడానికి

కష్టేఫలి

సృష్టి వైఖరి..!!

#రాఖీ రెక్కలు

బంధాలు 

పలుచనౌతు

సంబరాలు 

పెట్రేగుతు..

రాశి పెరిగి

వాసి తరిగి..!

#రాఖీ రెక్కలు

ఆశ 

ఆకాశం

నిరాశ

పాతాళం

స్వర్గం ఆచూకి

గగనంలోనే..!!

#రాఖీ రెక్కలు

కదలివస్తోంది

కరోనా బిరానా

రైళ్ళువిమానాలు 

ఎర్ర బస్సుల్లో

ఎవడి చావు వాడే

కేర్లెస్గా చావండెహే..!

#రాఖీ రెక్కలు

జుట్టు

కాళ్ళు

ఏరు

తెప్ప

సామెత పాతే

రాజకీయాల్లో రోతే..!

#రాఖీ రెక్కలు

ఏ ఎద్దు 

ఎటులాగినా

తిరిగేది 

పరిధిలోనే

దాంపత్యం

ఓ గానుగ..!

#రాఖీ రెక్కలు

రెక్కలు విరిచిన 

బాలలు

రెక్కలుడిగిన

వృద్ధులు..

పెరిగుతున్న ఆశ్రమాలు

అమానవీయ ఆనవాళ్ళు..!

#రాఖీ రెక్కలు